DJ ગીત વિવાદ પર ગેનીબેન ઠાકોરનું નિવેદન: સમાજના હિત માટે શહીદ થવું પડે તો પણ હું તૈયાર છું

DJ ગીત વિવાદ પર ગેનીબેન ઠાકોરનું નિવેદન વાવ-થરાદ, બનાસકાંઠા અને પાટણ જિલ્લાઓમાં ઠાકોર સમાજના બંધારણમાં ડી.જે. વગાડવા અંગેનો મુદ્દો હાલ ભારે ચર્ચામાં છે. આ બંધારણના વિરોધમાં કેટલાક કલાકારો દ્વારા સોશિયલ મીડિયામાં ઉશ્કેરણીજનક ગીતો રજૂ કરવામાં આવી રહ્યા છે, જેના કારણે સમાજમાં તણાવની સ્થિતિ ઉભી થઈ છે.

આ સમગ્ર મામલે તાજેતરમાં “આ બંધારણવાળાને મારો બંદૂકની ગોળી” શીર્ષકવાળું એક ગીત સોશિયલ મીડિયા પર વાયરલ થયું છે. આ ગીતે સમગ્ર જિલ્લામાં વિવાદનું સ્વરૂપ ધારણ કર્યું છે.

DJ ગીત વિવાદ પર ગેનીબેન ઠાકોરનું નિવેદન

કલાકારો સામે કડક કાર્યવાહી, નાત બહાર કરવાની ઘટના

આ વિવાદ દરમિયાન ડીસાના કેટલાક કલાકાર બંધુઓને સમાજમાંથી નાત બહાર કરવાનો નિર્ણય પણ લેવામાં આવ્યો હોવાનું જાણવા મળ્યું છે. સમાજના નિયમો અને પરંપરાઓને લઈને આ નિર્ણય લેવાયો હોવાનું સમાજના આગેવાનોએ જણાવ્યું છે.

સાંસદ ગેનીબેન ઠાકોરનું સ્પષ્ટ નિવેદન

આ મામલે બનાસકાંઠાના સાંસદ ગેનીબેન ઠાકોરએ વાવ-થરાદ ખાતે મીડિયા સાથે વાતચીત કરતા મહત્વપૂર્ણ નિવેદન આપ્યું છે. તેમણે જણાવ્યું કે,

મને આ ગીત કયા કલાકારે ગાયું છે કે કઈ જગ્યાનું છે તેની સંપૂર્ણ માહિતી નથી, પરંતુ વીડિયોમાં ‘બંધારણ બનાવનારાઓને ગોળી મારો’ જેવો ઉશ્કેરણીજનક સંદેશો સ્પષ્ટ રીતે સંભળાય છે.

કલાકારોએ મર્યાદામાં રહીને ગીતો ગાવા જોઈએ

ગેનીબેન ઠાકોરે ભારપૂર્વક જણાવ્યું કે ભારતીય બંધારણ કોઈ એક વ્યક્તિ કે સમાજના હિત માટે નહીં, પરંતુ તમામ સમાજના કલ્યાણ માટે બનાવવામાં આવ્યું છે. આવા બંધારણ સામે હિંસક ભાષા વાપરતા ગીતો ગાવા યોગ્ય નથી.

તેમણે કલાકારોને અપીલ કરતા કહ્યું કે,

કલાકારોએ મર્યાદામાં રહીને, ભારતીય સંસ્કૃતિ અને સમાજની ભાવનાઓને અનુરૂપ ગીતો ગાવા જોઈએ. ઉશ્કેરણીજનક ગીતો સમાજમાં વિખવાદ ફેલાવે છે.

સમાજ માટે શહીદ થવું પડે તો પણ તૈયાર

ગેનીબેન ઠાકોરે પોતાના નિવેદનમાં વધુમાં કહ્યું કે,

“જો સમાજ સુધારાના હેતુ માટે કોઈને શહીદી વહોરવી પડે તો તેનું નામ ઇતિહાસમાં સુવર્ણ અક્ષરે લખાશે. વ્યક્તિગત રીતે કહું તો, જો સમગ્ર સમાજનું ભલું થતું હોય તો ગોળી ખાવા માટે હું પોતે પણ તૈયાર છું.”

તેમના આ નિવેદન બાદ રાજકીય અને સામાજિક વર્તુળોમાં ભારે ચર્ચા શરૂ થઈ છે.

ડી.જે. બંધારણ અને વાયરલ ગીત મામલે ઉદભવેલો વિવાદ હવે માત્ર સાંસ્કૃતિક મુદ્દો ન રહી, પરંતુ સામાજિક અને રાજકીય ચર્ચાનો વિષય બની ગયો છે. આવનારા દિવસોમાં સમાજ અને પ્રશાસન આ મુદ્દે શું નિર્ણય લે છે તે જોવાનું રહેશે.

વોટ્સએપ ચેનલ	અહીં ક્લિક કરો
ફેસબુક	અહીં ક્લિક કરો
ઇન્સ્ટાગ્રામ	અહીં ક્લિક કરો
યુટ્યુબ	અહીં ક્લિક કરો
વધુ સમાચાર	અહીં ક્લિક કરો