સુઈગામ હાઈવે પર રાત્રિનો ખતરો: પોલીસ બેરીકેડ બાદ ટ્રક ખેતરમાં ખાબકી

સુઈગામ હાઈવે પર રાત્રિનો ખતરો ભાભર–સુઈગામ નેશનલ હાઈવે પર આવેલા ભારતમાલા રોડ પર અકસ્માતોની સંખ્યા દિવસેને દિવસે વધી રહી છે. ખાસ કરીને રાત્રિના સમયે વાહન ચાલકો માટે આ માર્ગ જોખમજનક બની રહ્યો છે. ગત રાત્રિના સુમારે સુઈગામ તાલુકાના જોરાવરગઢ ગામ નજીક ટોલ ટેક્સ પાસે એક ગંભીર અકસ્માત સર્જાયો હતો, જેમાં એક ટ્રક રેલિંગ તોડી ખેતરમાં ખાબકી ગયો હતો.

આ અકસ્માતમાં ટ્રક ચાલકને પગના ભાગે ગંભીર ઈજાઓ પહોંચતાં તેને તાત્કાલિક સારવાર માટે હોસ્પિટલમાં ખસેડવામાં આવ્યો હતો. અકસ્માત બાદ હાઈવે પર થોડો સમય અફરાતફરીનો માહોલ સર્જાયો હતો.

પોલીસ બેરીકેડથી અકસ્માત થયો હોવાનો દાવો

ટ્રક સાથે રહેલા અન્ય ડ્રાઈવરે જણાવ્યું હતું કે, રાત્રિના સમયે ચાલુ ટ્રક સામે અચાનક પોલીસ દ્વારા બેરીકેડ મૂકવામાં આવ્યો હતો. અંધારું અને અચાનક અવરોધ આવતા ડ્રાઈવર ટ્રક પરનો કાબુ ગુમાવી બેઠો અને ટ્રક સીધો ખેતરમાં ખાબકી ગયો હતો.

સિવિલ ડ્રેસમાં પોલીસ દ્વારા ઉઘરાણીના ગંભીર આરોપો

અકસ્માત બાદ ટ્રક ડ્રાઈવરોમાં ભારે રોષ જોવા મળ્યો હતો. ડ્રાઈવરોનો આરોપ છે કે, સિવિલ ડ્રેસમાં પોલીસકર્મીઓ આવીને ટ્રક ડ્રાઈવરોને રોકી હેરાન-પરેશાન કરે છે અને નાની-મોટી રકમની ગેરકાયદે ઉઘરાણી કરે છે.

ટ્રક ડ્રાઈવર દેવ કિશન રાવે જણાવ્યું હતું કે, ગુજરાતમાં સુઈગામ, આડેસર અને સાંતલપુર વિસ્તારોમાં પોલીસ દ્વારા ટ્રક ડ્રાઈવરોને વારંવાર હેરાન કરવામાં આવે છે. તેમણે વધુમાં કહ્યું કે, રાત્રિના સમયે જો ડ્રાઈવરો રકમ આપવાનો ઇનકાર કરે તો તેમની સાથે મારપીટ કરવામાં આવે છે, જે ગંભીર બાબત છે.

સલામતી કે દબાણ? અનેક સવાલો ઊભા

હાઈવે પર ટ્રાફિક નિયમન અને સલામતી જરૂરી છે, પરંતુ ટ્રક ડ્રાઈવરોના આક્ષેપો અનેક પ્રશ્નો ઊભા કરે છે. રાત્રિના સમયે અચાનક બેરીકેડ મૂકવું, યોગ્ય લાઈટિંગ વગર વાહનો અટકાવવું — આ બધું અકસ્માતને આમંત્રણ આપે છે.

તટસ્થ તપાસની માંગ

આ સમગ્ર ઘટનાને લઈને ટ્રક ડ્રાઈવરો દ્વારા તટસ્થ અને નિષ્પક્ષ તપાસ કરવાની માંગ ઉઠી છે. જો આક્ષેપો સાચા સાબિત થાય તો જવાબદાર અધિકારીઓ સામે કડક કાર્યવાહી થાય તેવી માંગ પણ કરવામાં આવી છે.

હાઈવે પર ચાલતા વાહનચાલકોની સલામતી પ્રથમ પ્રાથમિકતા હોવી જોઈએ. આવી ઘટનાઓ ફરી ન બને તે માટે પ્રશાસન દ્વારા યોગ્ય પગલાં લેવાય તે અત્યંત જરૂરી બની ગયું છે.

વોટ્સએપ ચેનલ	અહીં ક્લિક કરો
ફેસબુક	અહીં ક્લિક કરો
ઇન્સ્ટાગ્રામ	અહીં ક્લિક કરો
યુટ્યુબ	અહીં ક્લિક કરો
વધુ સમાચાર	અહીં ક્લિક કરો