“થરાદ બનશે દેશભક્તિનું રાજધાની કેન્દ્ર: 26 જાન્યુઆરીના રાજ્યકક્ષાના મહામહિમ કાર્યક્રમ માટે પોલીસની તડામાર તૈયારી”

થરાદ બનશે દેશભક્તિનું રાજધાની કેન્દ્ર થરાદ તાલુકાના મલુપુર ખાતે 26 જાન્યુઆરીના પ્રજાસત્તાક દિનની રાજ્યકક્ષાની ઉજવણી માટે વાવ–થરાદ જિલ્લો દેશભક્તિના રંગે રંગાઈ ગયો છે. સમગ્ર ગુજરાતમાંથી નજર થરાદ પર ટકી છે, જ્યાં રાજ્યપાલ અને મુખ્યમંત્રીના સાનિધ્યમાં ભવ્ય ધ્વજવંદન અને પરેડ યોજાશે.

આ ભવ્ય આયોજનની પૂર્વ તૈયારીના ભાગરૂપે ગુજરાત પોલીસ દ્વારા પોલીસ અધિક્ષકની હાજરીમાં ફૂલ રિહર્સલ યોજાયું હતું. પરેડની ગોઠવણી, સુરક્ષા વ્યવસ્થા, વાહનવ્યવહાર નિયંત્રણ, VIP મૂવમેન્ટ તેમજ ઇમરજન્સી પ્રતિભાવ ટીમોની કામગીરીનું પ્રત્યક્ષ નિરીક્ષણ કરવામાં આવ્યું.

પોલીસ અધિક્ષકે જણાવ્યું કે 26 જાન્યુઆરીના રાજ્યકક્ષાના મુખ્ય કાર્યક્રમ માટે 24 જાન્યુઆરી સુધીમાં બે વધુ રિહર્સલ યોજાશે જેથી દરેક વ્યવસ્થા નિખૂટ અને સુવ્યવસ્થિત રહે.

આ કાર્યક્રમને વધુ રાષ્ટ્રીય ગૌરવભર્યો બનાવવા માટે ગુજરાત પોલીસ દ્વારા 22 અને 23 જાન્યુઆરીએ વિશેષ કાર્યક્રમોનું આયોજન કરવામાં આવ્યું છે. 22 જાન્યુઆરીએ રાજ્યની એન્ટી ટેરરિસ્ટ ટાસ્ક ફોર્સ અને ચેતક કમાન્ડો ફોર્સ દ્વારા શક્તિ અને સુરક્ષાનું લાઈવ ડ્રિલ નિદર્શન કરવામાં આવશે, જે લોકોમાં સુરક્ષા અને રાષ્ટ્રભાવનાનો વિશ્વાસ વધારશે.

આ વર્ષે થરાદ ખાતે યોજાનાર પરેડમાં કુલ 22 પ્લાટુન ભાગ લેશે, જેમાં મહિલા અને પુરુષ પોલીસ પ્લાટુન, ચેતક કમાન્ડો, મરીન ટાસ્ક ફોર્સ, રાષ્ટ્રીય રક્ષા શક્તિ યુનિવર્સિટી, NCC, NSS, GRD અને હોમગાર્ડનો સમાવેશ થશે.

વિશેષ આકર્ષણ રૂપે ચેતક કમાન્ડો ફોર્સ અને મરીન ટાસ્ક ફોર્સના શાનદાર ટેબ્લો પરેડમાં જોડાશે, જે દર્શકો માટે રોમાંચ અને ગૌરવનો અનુભવ કરાવશે.

પરેડ પૂર્ણ થયા બાદ પોલીસ વિભાગ અને જિલ્લા વહીવટી તંત્ર દ્વારા સાંસ્કૃતિક કાર્યક્રમનું પણ આયોજન કરાયું છે, જેમાં ગુજરાતની સંસ્કૃતિ, શૌર્ય અને એકતાનું પ્રદર્શન કરવામાં આવશે.

થરાદમાં યોજાનાર આ રાજ્યકક્ષાનો પ્રજાસત્તાક દિન કાર્યક્રમ માત્ર ઉજવણી નહીં પરંતુ દેશપ્રેમ, એકતા અને રાષ્ટ્રીય ગૌરવનો જીવંત સંદેશ બનશે.

વોટ્સએપ ચેનલ	અહીં ક્લિક કરો
ફેસબુક	અહીં ક્લિક કરો
ઇન્સ્ટાગ્રામ	અહીં ક્લિક કરો
યુટ્યુબ	અહીં ક્લિક કરો
વધુ સમાચાર	અહીં ક્લિક કરો