WTC 2025-27: શ્રીલંકા સામે ગાલે ટેસ્ટમાં 165 રનની શાનદાર જીત મેળવીને ટીમ ઈન્ડિયાએ વર્લ્ડ ટેસ્ટ ચેમ્પિયનશિપ WTC 2025-27 ની ફાઈનલની રેસમાં ફરી પોતાની દાવેદારી મજબૂત કરી છે. શુભમન ગિલની આગેવાની હેઠળ ભારતે શ્રીલંકાને 372 રનનો લક્ષ્યાંક આપ્યો હતો, જેના જવાબમાં યજમાન ટીમ 206 રનમાં ઓલઆઉટ થઈ ગઈ.
ભારતની જીતમાં દેવદત્ત પડિકલની 167 રનની શાનદાર ઈનિંગ અને બોલરોના અસરકારક પ્રદર્શનનો મોટો ફાળો રહ્યો. આ જીત સાથે બે ટેસ્ટની શ્રેણીમાં ભારતે 1-0ની લીડ મેળવી છે. હવે બીજી ટેસ્ટ 23 ઓગસ્ટથી કોલંબોમાં રમાશે.
WTC પોઈન્ટ ટેબલમાં ભારતને કેટલો ફાયદો?
ગાલે ટેસ્ટ પહેલાં ભારતનો Points Percentage (PCT) 48.15% હતો, જે જીત બાદ વધીને 53.33% થયો છે. ભારતના હવે 10 ટેસ્ટમાં 5 જીત સાથે 64 પોઈન્ટ છે. જોકે, જીત છતાં ભારત પાંચમા સ્થાને જ છે. એટલે પોઈન્ટ ટેબલમાં સ્થાન બદલાયું નથી, પરંતુ ફાઈનલની રેસમાં ભારતની સ્થિતિ ચોક્કસપણે સુધરી છે.
ફાઈનલ માટે હવે શું છે ભારતનું ગણિત?
WTC 2025-27: ભારતને હજુ 8 ટેસ્ટ મેચ રમવાની છે. તેમાં શ્રીલંકા સામે એક ટેસ્ટ, ન્યૂઝીલેન્ડ સામે બે ટેસ્ટ અને ઓસ્ટ્રેલિયા સામે ઘરઆંગણે પાંચ ટેસ્ટનો સમાવેશ થાય છે. આગામી મેચોમાં ભારત માટે દરેક પોઈન્ટ મહત્વનો રહેશે. જો ભારત સતત જીત મેળવશે તો PCTમાં મોટો સુધારો થઈ શકે છે. ઉદાહરણ તરીકે, બાકીની 8માંથી 6 મેચ જીતે અને 2 હારે તો ભારતનો PCT લગભગ 62.96% સુધી પહોંચી શકે છે.
પરંતુ માત્ર 6 જીતથી ફાઈનલમાં સ્થાન નિશ્ચિત થઈ જશે એવું કહી શકાય નહીં. અંતિમ ક્વોલિફિકેશન અન્ય ટીમોના પરિણામો અને તેમના PCT પર પણ નિર્ભર રહેશે.
આ પણ વાચો: અપડાઉન કરતા મુસાફરો માટે મોટો નિર્ણય, હવે 15 દિવસના ભાડામાં 30 દિવસ મુસાફરી, જાણો સંપુર્ણ માહીતી
હવે ભારત સામે મોટો પડકાર
શ્રીલંકા સામેની જીતથી ભારતે ચોક્કસપણે WTC 2025-27 ની રેસમાં વાપસી કરી છે, પરંતુ આગળનો રસ્તો સરળ નથી. શ્રીલંકા બાદ ન્યૂઝીલેન્ડ અને ત્યારબાદ ઓસ્ટ્રેલિયા સામેની ટેસ્ટ સિરીઝ ભારત માટે નિર્ણાયક બની શકે છે.
ગાલેની જીતે આશા જગાવી છે, હવે કોલંબોમાં બીજી જીત ભારતને ફાઈનલની રેસમાં વધુ મજબૂત સ્થિતિમાં લઈ જઈ શકે છે.
