Banaskantha Success Story: બનાસકાંઠા જિલ્લાના પાલનપુર તાલુકાના ખસા ગામે રમતગમત ક્ષેત્રે પ્રેરણાદાયી સિદ્ધિ હાંસલ કરી છે. આશરે 3,500ની વસ્તી ધરાવતા આ નાનકડા ગામની સરકારી પ્રાથમિક શાળાની 25 દીકરીઓએ માત્ર ત્રણ વર્ષમાં કબ્બડીમાં એવી સફળતા મેળવી છે કે આજે સમગ્ર જિલ્લામાં તેમની ચર્ચા થઈ રહી છે.
આ સફળતા પાછળ શાળાના વ્યાયામ શિક્ષક પ્રકાશભાઈ પ્રજાપતિની અવિરત મહેનત, સમર્પણ અને દીકરીઓ પ્રત્યેનો વિશ્વાસ મુખ્ય કારણ બન્યો છે.
Banaskantha Success Story 2023થી શરૂ થઈ સફળતાની સફર
વર્ષ 2023માં પ્રકાશભાઈ પ્રજાપતિની બદલી ખસા ગામની પ્રાથમિક શાળામાં થઈ હતી. તે સમયે ગામમાં કબ્બડી વિશે ખાસ જાણકારી નહોતી. પરંતુ ગામની ગરીબ પરિવારોની દીકરીઓમાં રહેલી રમતગમતની પ્રતિભા ઓળખીને તેમણે તાલીમ શરૂ કરવાનો નિર્ણય લીધો.
શાળા પૂર્ણ થયા બાદ દરરોજ સાંજે અને રવિવાર તેમજ રજાના દિવસોમાં સવારે કલાકો સુધી દીકરીઓને નિયમિત તાલીમ આપવામાં આવી. દીકરીઓના અભ્યાસને કોઈ અસર ન થાય તેની ખાસ કાળજી રાખવામાં આવી.
સતત ત્રણ વર્ષમાં નોંધપાત્ર સિદ્ધિઓ
પ્રથમ વર્ષે ટીમે બનાસકાંઠા જિલ્લામાં ત્રીજું સ્થાન મેળવ્યું અને ચાર દીકરીઓ રાજ્ય કક્ષાએ રમવા પહોંચી.
બીજા વર્ષે ખસા ગામની ટીમ સમગ્ર બનાસકાંઠા જિલ્લામાં ચેમ્પિયન બની. નવ દીકરીઓ રાજ્ય કક્ષાએ પસંદ થઈ અને એક ખેલાડીએ નેશનલ સ્તર સુધી પહોંચીને ગામનું ગૌરવ વધાર્યું.
ત્રીજા વર્ષે અમરેલી ખાતે યોજાયેલા ખેલ મહાકુંભમાં સરકારી શાળાની ટીમે ખાનગી એકેડેમી અને સ્પોર્ટ્સ સ્કૂલ જેવી મજબૂત ટીમોને પાછળ રાખીને સમગ્ર ગુજરાતમાં ત્રીજું સ્થાન મેળવ્યું.
9 દીકરીઓને મળશે દર મહિને ₹5,000ની સ્કોલરશિપ
અમરેલીમાં થયેલા શાનદાર પ્રદર્શન બાદ 13 દીકરીઓએ Centre of Excellence (COE) માટે પરીક્ષા આપી હતી. જેમાંથી 10 દીકરીઓની પસંદગી નિશ્ચિત માનવામાં આવી રહી છે અને 9 દીકરીઓને દર મહિને ₹5,000ની શિષ્યવૃત્તિ મળશે.
આ આર્થિક સહાય ગરીબ પરિવારો માટે આશીર્વાદ સમાન સાબિત થશે અને દીકરીઓને રમતગમતમાં આગળ વધવા વધુ પ્રોત્સાહન મળશે.
રાજ્ય સરકારનો વિશેષ સન્માન
ખસા ગામની આ અનોખી સિદ્ધિને રાજ્ય સરકારે પણ નોંધ લીધી છે. ગુજરાતમાં પ્રથમ વખત કોઈ સરકારી પ્રાથમિક શાળાને કબ્બડી માટે અંદાજે ₹5 લાખના ખર્ચે વિશેષ રબર મેટ કોર્ટ ફાળવવામાં આવ્યો છે. આ સુવિધાથી ગામની આગામી પેઢીના ખેલાડીઓને વધુ સારી તાલીમ મળશે.
શિક્ષકનું મોટું સપનું
Banaskantha Success Story: વ્યાયામ શિક્ષક પ્રકાશભાઈ પ્રજાપતિનું સપનું માત્ર રાજ્ય કે રાષ્ટ્રીય સ્તર સુધી મર્યાદિત નથી. તેઓ ઇચ્છે છે કે ખસા ગામની કોઈ એક દીકરી ભારતની કબ્બડી ટીમમાં સ્થાન મેળવે અને આંતરરાષ્ટ્રીય મંચ પર દેશનું ગૌરવ વધારે.
ખસા ગામની આ પ્રેરણાદાયી સફળતા સાબિત કરે છે કે યોગ્ય માર્ગદર્શન, સતત મહેનત અને મજબૂત સંકલ્પ હોય તો નાનકડા ગામમાંથી પણ મોટા ખેલાડીઓ તૈયાર થઈ શકે છે.
Home : Maru vav Tharad
Instagram : Maru Vav Tharad
